曾與澳斯卡串Ｑ！郭能新座騎 現真面目贏條街

02754566

雷神莫雷拉停賽，這天賽事繼續群雄無首，騎師王陷入混戰亂局，即使跑完第九場後，依然有五、六位騎師有機會終極封王，情況並不常見。
講番第九場三班1400米，郭能新接手蘇保羅馬房之「健康歡笑」後上一攻而破，此駒上季曾與翻版步步友「澳斯卡」串Ｑ，但在港從未贏過，上月初在1400米只得第八，不過今仗再出爭同程，卻以超班姿態大勝開齋，單Win同組合獨贏A2，分別派52.5同30.5元，表現同上仗配田泰安判若兩駒，當然亦同上次排13檔望空跑，而今3檔起步跑落有遮擋有關。
無論如何，郭能連同第五場初策即勝的葉廐馬「相中有你」在內，成為這天暫時唯一起孖的騎師，並領先騎師王帶入尾場。
雷神停賽自然座騎旁落，第九場跑第二係由佢贏開的「揮闖」，新接手的湛明諾進入倒數階段，跑埋本月17日佢就會約滿離職，「揮闖」後上入Ｑ全無威脅，輸給「健康歡笑」三個多身位。今場三、四名都係華將冷馬，分別為鄭雨滇的「大笑大少」及何澤堯的「藍雪山」，四重彩派20萬鬆啲。
提起華將，本來停賽至本月17日才可復出的吳嘉晉，這天毫無先兆下突然復出，今場臨時代替身體不適的楊明綸騎113輕磅馬「中華壹號」出賽，結果此駒名落孫山。呢種換人情況在港從未試過，估計係馬會因應早前「如你所願」冇合適騎師而被逼臨場退出，檢討過相關條例後，對馬匹臨場換人作出一定程度的放寬。