近期飽受主將離隊傳聞困擾的阿仙奴，昨日抵達馬來西亞，展開今夏亞洲之旅，雖然隊長法比加斯、前鋒賓特拿及門將艾蒙尼亞沒有隨隊，但球會抵埗後即公佈法甲冠軍里爾射手謝雲奴落實加盟「沖喜」，領隊雲格亦連環拋出金句，堅信盛傳他投的拿斯尼及法比加斯最終留隊。
大馬宣佈謝雲奴加盟
即使盛傳有多名主力被撬，坐了十多小時長途機的雲格仍然笑笑口，在吉隆坡出席記者會時，先證實科特迪瓦射手謝雲奴已正式加盟：「他上周四通過體測，但要安頓妻兒，不會來大馬和中國，但已在倫敦開始操練。」
今次是兵工廠自 1999年後再訪大馬，由於法比加斯「因傷」沒有隨隊，焦點就落在另一盛傳離隊的拿斯尼身上；昨午簽名會就有大批兵工廠迷苦求他留隊，雲格亦開口「箍煲」，指拿斯尼最後會和法比加斯齊齊留低：「我不想此時再成為各報的頭條，我預期他（拿斯尼）會留隊，如果我是他，一定會和阿仙奴簽下新合約！」此話一出，全場即報以掌聲，他補充球隊經過數年磨合已逐漸成熟，有望今季打破持續 6季的錦標荒，他說：「如果我沒有信心，就不會坐在這兒。」
尹佩斯籲法比仔留隊
雲格的想法獲尹佩斯力撐，這位荷蘭前鋒接受專訪時揚言，球隊已夠班於本土賽事稱霸；他又大打溫情牌，呼籲法比加斯留隊：「我和他合作多時，已產生化學作用，只得他有能力交出恰到好處的傳送，如果他要走，我會很失望。」阿仙奴今日傍晚將進行首課公開操練，明日會對馬來西亞明星隊；但吉隆坡近日氣溫高達攝氏 34度，而且有煙霞，空氣混濁，只復操個多星期的尹佩斯坦言有少許擔心。
大馬教練替魔爆廠
咪以為馬來西亞實輸俾阿仙奴！主隊教練華澤高柏（ K.Rajagopal）賽前高調喺記者會承認自己係曼聯粉絲，球員亦多數撐紅魔，只有兩個支持「兵工廠」，搞到雲格同現場過百名記者笑個不停。華澤高柏仲話大馬夠年輕，有拼勁，唔會一味死守，話唔定假以時日有球員可以加盟阿仙奴。
尹佩斯有求必應
阿仙奴近年雖每每同獎盃擦身而過，不過踢法悅目，一向深受球迷歡迎；今次到訪大馬， 23名球員齊齊喺下塌酒店出席簽名會，個個都有求必應，任簽任影，唔怪得近百名一早攞到籌嘅球迷開心到發緊夢一樣。咁多個球員入面，全程「四萬」笑容嘅尹佩斯最受歡迎，至於拿斯尼可能受轉會傳聞影響，冷清好多。
球迷追兵拉埋天窗
睇波睇到拉埋天窗？ 23歲女大學生 Aymarn 同比佢細一年嘅未婚夫 Zafirah，噚日一齊追「兵」，由機場追到酒店，終於獲得雲格揮筆簽名。原來兩人幾年前認識，同樣係阿仙奴球迷，感情發展一日千里，仲定喺明年拉埋天窗。相信雲格都估唔到阿仙奴會變「紅娘」！ |
發表於 2011-7-12 10:01 AM
| 