雷神揀錯馬！益咗韋達與「兄」慶生

02754566

外號十三少的韋達，禮拜三晚爆冷贏苗廐「金領宙」，成為他在港第1,700場頭馬。周日（15日）是他44歲牛一，這天生日前夕出賽，結果韋達前九場都未入過凱旋門，僅憑第八場「夢仙」拎過一席季軍，但到尾場三班1600米韋達海底撈月，重新接手練馬師告東尼的「尊兄」後上一攻而破，贏馬預祝自己生辰快樂，個人連勝三期冇斷纜。
「尊兄」之前從未試過連捷，上仗雷神初策即勝，今場雷神揀時廐「奇真」，亦放棄埋胡廐「皇牌」。結果世事無絕對，「尊兄」首次由韋達贏馬，即破數據取得連捷，五歲馬今季四戰兩冠一亞，表現大熟大勇。
反觀「奇真」直路於內欄等位卻重重圍困，望空之際對手已到終點，卒之3.4倍大熱門輸到只得第七。至於一對由貝諾華及史卓豐分策之冷馬「贏男」及「歡樂盈盈」，後上鬥到難分難解，成為平頭亞軍。尾場跑第四係熱門之一「皇牌」。雷神呢場雖有老貓燒鬚揀錯馬之嫌，但無阻佢以44分勝出這天騎師王。