【魯賓遜睇通睇透】甜蜜鑽石1600績佳

02754566

鄭俊偉上季只贏13場，但最後憑「好好計」在美國勝出一級賽所帶來的獎金，結果成功達到馬會的最低要求，但以一個當時養馬超過50匹的大倉而言，成績絕對不理想，難怪之後流失了一大批馬，現時養馬只有47匹。今季只跑了38期賽事，鄭廐已贏九W，成績有明顯好轉，而當中有四場是五班頭馬，反映上季低潮令馬匹評分下滑，今季乘勢在五班反彈，鄭俊偉今季在五班出馬40次，成績四冠五亞兩季，入Q率超過20%，其中季內曾經上名的「保証滿意」及「四小福」，表現好開就好，而且最終都能夠在曾經上名的路程贏馬。
周日報跑五班1600米的鄭廐馬「甜蜜鑽石」，大前仗跑同程得第二，只輸給再出再贏的「神威福將」個幾馬位，第三名的「天狼星」及第四名的「森林姿彩」之後相繼贏馬，足證該賽水準極高。上仗增程跑田草1800米，輸一馬位跑第三，最後200米衝刺力一般。Pentire子嗣踏入五歲正值當打之年，全熟後有望反彈上四班，今次跑番更合腳法的1600米，比上場孭少三磅，末段衝刺會更有勁，面對五班對手，可望打開在港勝利之門。