【有料到】趕考閘匆匆再戰 皆因上仗唔服輸

02754566

練馬師沈集成上周四谷草日賽中三元後，頭馬數字升至49場，創下個人從練以來一季最佳成績，當然要在龍虎榜上追趕現領先15WIN的蔡約翰實談何容易，但馬房氣勢正盛，亦有馬未交代，相信攻勢仍會持續。
周三晚沈集成在頭場五班1800米，「領航大師」便急需一場頭馬作交代。此駒在澳洲賽績平常，來港後獲評67分，但目前四歲質素尚新，經過連場敗仗，評分不斷下調，季中終可降至五班，表現隨即開始接近，展現準備反彈的跡象。
「領航大師」上仗於本月初角逐谷草1650米，臨場落飛大熱開跑，可是起步時起擒大漏閘，至少蝕三、四個馬位，轉彎入直路又抄大外疊發力，嚴重蝕位下依然後上跑第三，追剩不足一馬位輸畀「非凡者」，難怪賽後潘頓落馬時，見沈集成全程黑面。賽後小組要求「領航大師」試閘合格才再次上陣，練者亦不敢怠慢，跑完一星期內便安排牠試閘，並指定由潘頓主理，今場增程谷草1800米，以「領航大師」上場之追勢，增程百利而無一害，相信潘頓會做番齣好戲，替「領航大師」開齋。