榮智健打吡武器捧盃！個半月前贏1200米 話咁快贏1800米

02754566

莫雷拉係神級騎師，神級練馬師則非蔡約翰莫屬，這天神蔡同雷神第三場先合作贏「育成寶寶」，第四場雷神策「運財之星」與蔡廐「精算博奕」包辦連贏。
到第五場三班草地1800米，就由蔡約翰獨領風騷，佢安排已報名打吡大賽之「東方快車」加程初跑1800米，結果此駒在田泰安胯下均速前置奠勝，繼約個半月前贏1200米後，取得服役第二捷之餘，亦捧走本屆樂善堂盃，更寫下六戰兩勝三位一殿佳績，為進軍今年打吡踏出第一步，而阿蔡自己連同第三場勝出「育成寶寶」在內，全日兩匹王牌馬話咁快已經大熱贏晒，造就佢起孖累積24Win與呂健威並列榜首。
「東方快車」馬主係榮智健，此駒於去年11月尾開齋，當日佢冇到場，這天則偕妻及老友任志剛齊拉頭馬威番次。10號馬贏開有條路，第三、四、五場「育成寶寶」、「運財之星」及「東方快車」逐一大熱贏馬攞威，其中「東方快車」單Win派42.5元，組合獨贏A1則派21.5元。
呢場前四名有熱有冷，第二名係63倍「閃電王」，第三名4.3倍次熱「實業風采」，25倍「寶正寶」則得第四，四重彩派19.7萬多元。「實業風采」鞍上人莫雅截至此場這天第四次跑位置，依然未入過凱旋門。
另一邊廂，雷神同場騎「團圓飛舞」於外欄衝落唔多三甲不入，呢匹八歲賽駒跨季六連勝後斷纜，神奇老馬不敗神話告終。