彈甩精英大師同主馬！女馬主珊珊短途惡覇攻陷一班賽

柏寶同潘頓剛周六齊於祖國澳洲出戰金拖鞋大賽日賽事，結果雙雙冇馬贏而最叻均跑第二。
這天回歸沙田大本營，柏寶率先贏馬補數，佢於第七場一班草地1200米，與嫡系馬「幸運如意」合演一場身價波。此駒半條直路於外欄長驅直進，完全冇將任何對手放在眼內，1.6倍大熱門就此彈甩對手兩位半輕易勝出，成為這天暫時最熱頭馬，組合獨贏順理成章開A1並派11.5元。
女馬主溫佩珊愛駒「幸運如意」6戰田草1200米4冠2亞，首次攻陷一班賽，這匹103分四歲澳洲自購馬，一早決定放棄打吡專心攻短途，做法果然正確。
今場二至四名順序由「英勇大師」、「龍城勇將」及「鄉村輝煌」奪得，四重彩派2,657元，亦係這天暫時最熱一場。
一代馬王「精英大師」的一對同主馬「星光大師」及「英勇大師」這天分途出擊，結果分別配何澤堯及韋達都做阿二，遺憾未能拉頭馬。

1 評分次數