雷神莫雷拉這晚仲停緊賽，柏寶趁自己旺兼強敵不在陣，第二場開始打叠贏馬，並以葉廐「可愛寶」及賢廐「恆駿寶駒」包辦第二口孖寶，個人連勝五次賽事未斷纜，季內累積30場頭馬，繼續守於騎師榜第二位。
第三場四班1200米，柏寶騎「恆駿寶駒」跑落胸有成竹，二檔起步沿途守在中前靚位，咬住步速跑，入正直路一望空即狂鞭座騎上前；結果一鼓作氣追過放到甩晒轆的史卓豐座騎「歡喜」，柏寶繼第二場為「可愛寶」開齋後，再幫埋另一匹處女馬「恆駿寶駒」出頭，個人自上月27日停賽復出以來，期期頭馬數目非一即二，一時間手風大順，而「恆駿寶駒」出道兩季跑到第七仗終於開齋，單win有2.9倍，組合獨贏A1派19.5元。至於「恆駿寶駒」練馬師蘇偉賢，近六戰五次有馬贏，馬房亦都旺極一時。
今場係全洋將天下，不過就熱頭冷腳，皆因二至四名順序「歡喜」（史卓豐）、「現代財星」（羅理雅）及「萬事盛」（韋達）都有一定分頭，四重彩大熱行頭因此都有7,007元派彩。
今場其實有個特別之處，全場僅「恆駿寶駒」、「歡喜」的綵衣有閃電圖案，且都是黃色閃電，結果就此包辦7.4倍熱門Ｑ |
發表於 2016-1-14 12:14 AM
| 