莫雷拉今季的表現，可以用「所向披靡」來形容，而且陣上走位變得機靈。上季他經常抄外叠後上，而座騎不時在直路內閃，即使最終成功贏馬，但因阻到對手，而付出停賽的代價。今季，雷神總會盡量將座騎移入內叠競跑，似乎已完全掌握香港賽馬的致勝竅門，難怪贏馬好似斬瓜切菜咁輕易，而且避免了阻人受罰，相信今季埋單計數，他必可再次刷新頭馬數目新高。
今季潘頓和郭能停賽多，加上幾位新公司騎師，表現未如理想，遂形成雷神獨大的局面。貝諾華及湛明諾都上陣超過50場，而加埋只得五W。重臨的霍勵賢表現更加不濟，出賽161次，只得三場頭馬。反而今季華將表現爭氣，其中黃皓楠、梁家俊及楊明綸，都已贏十場或以上。
已報跑周三晚四班1200米的「及時取勝」，出自Sebring配Exceed And Excel的血統組合，血緣早熟宜跑短途，至今在港出賽十次，有七場入前五名。自從轉投徐雨石馬房後，表現明顯有進步，前仗跑同程贏甩「紅衣前進」及「智勝明駒」，後駒翌仗跑同程補中贏馬。上場排12檔難跑，前中段留得後，末段姍姍來遲跑第五，初次見到咁好的追勢，四歲馬進度如日方中，近期晨課由楊明綸主操，安排連續三課拍跳，狀態勇不可擋，今場如排中內檔，贏馬機會全場最高。 |
發表於 2015-12-21 04:42 AM
| 