若要數說Volkswagen Golf GTI的特點，不用考慮便可告訴你，性能好、仲要易揸到極。早排喺德國試了MK7 Golf GTI，而且係230ps的Performance版，標準配備已包括前軸差速鎖、運動懸掛及全新的Progressive Steering系統，加上底盤調校精良，轟山路時猶如車神上身，無論大彎、細彎同樣一扭就入，不禁要問問自己，邊有咁定、咁靈活o架。揸住呢部車，凡人都可變超人！
MQB底盤輕磅減油耗於1976年誕生的Golf GTI，至今發展至第七代，37年間共售出接近190萬輛。回想起第一代Golf GTI，馬力只有81kW/110ps，但今日的第七代車型最少已有162kW/220ps，馬力足足提升了100%，當中的Performance版更有額外10ps輸出，達到169kW/230ps。出發前睇過一些資料，搭載六前速波箱及Start/Stop系統的MK7 Golf GTI，綜合油耗降低高達1.3L/100km（18%），但引擎依然是2.0 TSI、車身又大過上一代，那麼，油是從何慳來的呢？問過廠方人員，原來又是MQB底盤作怪，這個輕量化的技術平台配合更輕的驅動裝置，MK7 Golf GTI的車重由上代的1,393kg減輕至1,351kg，加上車身有更佳的空氣動力，這都是減省油耗的先決條件。
軚環好扭輕鬆到位抵達德國慕尼黑是清晨五點多、天還未光，吃過豐富的早餐、聽個簡單的Briefing，便開始試車行程，筆者獲分配一輛配備DSG波箱的Golf GTI Performance。上車後先設定導航，按指示輸入一個位於奧地利的地方名，不用3秒，導航便計算出行車路線，這時與身旁的行家的眼睛都「凸一凸」，究竟是地方名輸入錯誤，還是系統出錯呢？行程竟然有400km！重新輸入一次，結果都是一樣，那就信吧。開往奧地利途中，山路九曲十三彎，沿路都見不到其他香港及海外媒體，即使停下來拍照長達1小時，仍沒有車隊經過，莫非走錯了路？後來去到目的地，先知導航預設了Dynamic Route，近5小時的車程在山上唔知轟咗幾多個彎，雖然手都軟埋，但係可以認真試到部車還是值得的。今代Golf GTI配上一個名為Progressive Steering的系統，由最左轉到最右只有2.1圈，操控明顯較Golf上的2.75圈標準軚環敏捷得多，在複雜的山路快走，軚環一扭便到位，泊車掉頭也輕鬆過人。
230ps既快又好彎MQB底盤的威力早已在Golf見識過，這是一個非常強的底盤，即使強如Golf GTI，MQB都受得起有餘。為進一步提升彎路性能，廠方為Golf GTI Performance的前軸配上電子差速鎖及XDS+，系統不但可將適當的動力分配到左、右前輪，轉彎時更會對內側車輪施以輕微制動，「篤」住油攻進一個有Double Apex的彎中彎，四條胎叫都唔叫吓（測試車裝配了Bridgestone S001），車身跟着軚環指示順住過，彎路極限非常高，而且穩定得離譜！據海外媒體報道指，搭載這款前軸電子差速鎖的測試車，在紐布靈賽道的圈速比起配備普通差速器的車型快8秒，足可見其重要性。另一方面，230ps版Golf GTI還配上大型煞車系統，前、後迫力碟的尺寸分別達340×30mm及310×22mm，高速落斜期間仍能提供有效制動，加上波箱換檔反應快，連降兩檔快過打針，很容易便滿足到一般人對速度快感的追求。平心而論，Golf GTI Performance真的很厲害；另外，據悉輸港版本將有六前速手波及DSG波箱選擇，喜歡棍波的朋友要留意了。
規格表
車型：五門五座位揭背車
引擎：四汽缸TSI 容積：1,984c.c.
最大馬力：230ps/4,700~6,200rpm
最大扭力：350Nm/1,500~4,600rpm
傳動：六前速DSG雙離合器波箱
驅動：前置引擎、前輪驅動
制動：（前/後）通風碟
0~100km/h：6.4秒
綜合油耗：6.4L/100km
二氧化碳排放：149g/km
車身體積：4,268×1,799×1,442mm（長×闊×高）
|
發表於 2013-5-29 01:50 PM
| 
發表於 2013-6-14 12:58 PM
| 
我噤入黎就系想睇靚圖啊……