[新聞] 賓帥拭淚顯情義

八九年四月十五日，英國發生「希斯堡慘劇」。當時利物浦於英足盃作客錫周三希斯堡球場，期間球迷互相踐踏，最後有九十六名球迷喪生。前日紅軍於晏菲路球場舉行廿二周年紀念活動，超過一萬二千名球迷參加，利物浦球會上下包括領隊杜格利殊、受傷隊長謝拉特都有到場，而前任領隊賓尼迪斯亦有現身，並獲得球迷掌聲，悼念期間更感動得流下男兒淚，顯示佢對紅軍仍有好深感情。

謝拉特撐拐杖到場

利物浦呢間球會充滿人情味，是次到場球迷好多都神情肅穆，於球會外獻上花束，而謝拉特、丹尼爾艾格雖然剛做完手術，但都撐起拐杖堅持到場表達心意。而前主帥賓尼迪斯亦好有心回歸參與，去年佢就捐贈九萬六千鎊畀慘劇家屬，可謂有情有義。死難者家屬表示，希望球會神級人物杜格利殊可以封爵，並帶領紅軍重振雄風，以慰死者在天之靈。