[分享] 沙超盃｜C朗又輸決賽失冠 嬲爆寸隊友「瞓着」 賽後即走人拒領獎牌!

manyiu

2024年8月17日週六


沙超盃｜C朗又輸決賽失冠 嬲爆寸隊友「瞓着」 賽後即走人拒領獎牌

葡萄牙球王基斯坦奴朗拿度（Cristiano Ronaldo）向來敬業兼肉緊，落到場真係六親不認，一心只想贏波。上周六沙特超級盃決賽，效力艾納素、39歲的C朗44分鐘射破對手希拉爾大門，滿以為可以捧盃響頭炮，想不到，下半場被對手連追4球，倒輸1：4，沙特無冠魔咒延續。

球隊在不足20分鐘之間連輸四粒，難怪C朗會眼火爆，當場向隊友作出「瞓着」的手勢，寸他們不防守！之後又做出招牌的攤手、搖頭等埋怨動作，非常不滿隊友表現。完場後，C朗面燶燶，口中念念有詞離場，連亞軍獎牌也懶得領取，認真有火兼有性格。

贏冠軍的希拉爾球迷當然開心到飛起，在比賽期間不斷高呼C朗死敵「美斯！」的名字。沙特其他球隊都知道C朗的「死穴」是美斯，因此每次對戰都大叫「美斯！」，藉此刺激C朗情緒，希望他操之過急而影響發揮。


(Yasser Bakhsh via Getty Images)